ᒪᕐᕉᒃ ᐅᑭᐅᑦ ᐊᓂᒍᖅᓯᒪᓕᖅᑐᓂᑦ ᑕᖅᖀᓐᓇᕐᔪᐊᕐᒥᑦ, ᐊᑭᓚ ᐊᒪᕈᖅ ᐃᒥᐊᓗᖕᒧᑦ ᐊᔪᓕᕈᑎᖃᕐᓂᖓᓄᑦ ᑎᑭᓯᒪᓕᓚᐅᖅᑐᖅ.
“ᐃᒥᕋᔪᑦᑎᐊᓚᐅᖅᑐᒍᑦ, ᐊᒻᒪᓗ ᐅᖓᑎᓗᐊᖓᓄᑦ ᐃᒥᖅᓯᒪᓕᓚᐅᕐᒥᔪᖓ,” ᐃᖅᖃᐅᒪᔪᖅ ᖃᒪᓂᑦᑐᐊᕐᒥᐅᑕᖅ.
ᐊᓂᑉᓗᓂ ᐳᓗᐊᑦᑎᔭᖅᑐᓚᐅᖅᑐᖅ, ᑭᓯᐊᓂ ᐋᖓᔮᕐᓂᖓᓄᑦ, ᒪᔪᕋᐅᑎᓂᑦ ᑲᑕᓚᐅᖅᑐᖅ ᐊᒻᒪᓗ ᒪᑭᒃᑲᓐᓂᕐᓂᖅ ᐊᔪᓕᖅᖢᓂ. ᐊᒡᒑᒃᓯᒪᙱᖦᓗᓂ, ᐊᒪᕈᖅ ᖃᐅᔨᒪᔪᖕᓃᓚᐅᖅᑐᖅ, ᐊᒡᒐᖏᑦ ᖁᐊᖅᐸᓪᓕᐊᑉᓗᑎᒃ.
ᓄᑲᖅᖠᐅᔫᑉ ᐸᓂᐊᑕ ᓇᓂᓚᐅᖅᑕᖓ.
“ᐊᒃᑐᖅᓯᓂᖃᑦᑎᐊᓚᐅᖅᑐᖅ ᐅᕙᑉᑎᓂᓂᑦ, ᐅᕙᖓ ᐊᒻᒪᓗ ᓄᓕᐊᕋ, ᓇᓗᓇᙱᑦᑐᖅ ᐊᒃᑐᖅᑕᐅᓚᐅᖅᑐᖅᑕᐅᖅ ᐸᓂᒐ, ᓇᓂᓚᐅᕐᒪᖔ ᓯᓚᒥᑦ ᖃᐅᔨᒪᔪᖕᓃᖅᓯᒪᑎᓪᓗᖓ, ᐊᒡᒐᒃᑲ ᖁᐊᖅᓯᒪᑉᓗᑎᒃ,” ᐃᖅᖃᐅᒪᔪᖅ ᐊᒪᕈᖅ. “ᑕᐃᑲᙵᑦ ᓲᕐᓗ ᑐᐸᒍᑎᒋᓕᓚᐅᖅᑕᕋ.”
ᑕᐃᒪᙵᑦ ᐃᒥᓚᐅᖅᓯᒪᔪᖕᓃᖅᑑᒃ, ᐊᒪᕈᖅ ᐊᒻᒪᓗ ᐱᖃᑎᖓ ᑖᓖᓐ ᓄᑭᒃ ᐱᒋᐊᖅᑎᑦᑎᓚᐅᖅᑐᑦ ᒪᒥᓴᕐᓂᕐᒥᒃ, ᐋᖅᕿᖕᓂᕐᒧᑦ ᐊᒻᒪᓗ ᐃᒥᖃᑦᑕᕈᖕᓃᕐᓂᕐᒧᑦ ᑲᑎᒪᔨᓂᑦ ᖃᒪᓂᑦᑐᐊᕐᒥᑦ, ᐊᑎᖃᖅᑐᖅ ᐃᓄᒃᑎᑐᑦ ᒪᒥᒋᐊᖅᑕ-ᒥᑦ. ᑲᑎᒪᔨᑦ ᑐᒡᓕᐊᓂᑦ ᑲᑎᒪᓚᐅᖅᑐᑦ ᑕᒡᕙᓂ ᑕᖅᕿᒥᑦ, ᓯᑕᒪᓂᒃ ᓄᓇᓕᖕᒥᐅᑕᓂᒃ ᐃᓚᐅᔪᖃᖅᖢᑎᒃ.
‘ᑕᑯᖃᑦᑕᖅᑐᒍᑦ ᐃᓄᖕᓂᑦ ᐊᔪᓕᕈᑎᖃᖅᑐᓂᒃ ᖃᒪᓂᑦᑐᐊᕐᒥᑦ,” ᐅᖃᖅᑐᖅ ᐊᒪᕈᖅ. “ᐅᕙᒍᑦ ᐱᖃᑎᒐᓗ ᐊᔪᕈᑎᖃᓚᐅᖅᑐᒍᑦ ᐃᒥᐊᓗᖕᒥᑦ. ᐃᑲᔪᕈᒪᑐᐃᓐᓇᖅᑐᒍᑦ, ᓇᖕᒥᓂᖅ ᐊᒃᓱᕈᕈᑎᒋᓯᒪᔭᑉᑎᖕᓄᑦ, ᐃᑲᔫᑎᓗᑕ.”
ᐱᖃᑎᒌᒃ “ᓇᓗᓇᐃᒃᑯᑕᖃᙱᑦᑐᑦ ᐅᖃᓪᓚᐅᔾᔨᔨᐅᓂᕐᒧᑦ,” ᑭᓯᐊᓂ ᓄᓇᓕᖕᒥᐅᑕᐅᑉᓗᑎᒃ ᐃᑲᔪᕈᒪᑐᐃᓐᓇᖅᑐᑦ ᓄᓇᓕᖕᒥᐅᖃᑎᖏᓐᓂᑦ, ᐱᓗᐊᖅᑐᒥᑦ ᐱᑕᖃᙱᑎᓪᓗᒍ ᐊᔪᙱᓐᓂᖃᖅᑐᓂᒃ ᐃᑲᔪᖅᑕᐅᓂᐊᕐᓗᓂ. ᐃᑲᔪᖅᑕᐅᖃᑦᑕᕐᒥᔪᑦ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᒪᔪᓕᕆᔨᒧᑦ ᐳᕆᑎᔅ ᑲᓚᒻᐱᔭᒥᑦ, ᐊᑎᖃᖅᑐᖅ ᓰᓚ ᕚᓐ-ᒥᑦ, ᐅᖃᖅᑐᖅ ᓄᑭᒃ, ᐊᒻᒪᓗ ᖃᕆᑕᐅᔭᒃᑯᑦ ᑕᐅᑐᒍᑎᑉᓗᑎᒃ ᑲᑎᒪᖃᑎᒋᔭᐅᖃᑦᑕᖅᖢᓂ.
“ᖃᐅᔨᒪᔪᒍᑦ ᐊᒥᓱᑦ ᐃᓄᐃᑦ ᑕᑯᒋᐊᖃᑦᑕᖅᓯᒪᔪᑦ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᒪᔪᓕᕆᔨᒥᒃ, ᑭᓯᐊᓂ ᑕᑯᔭᐅᕝᕕᖓᓄᐊᖅᐸᑕ, ᐊᓯᐊᖑᓕᖃᑦᑕᖅᑐᖅ ᐃᓱᒪᓕᕆᔨ,” ᐅᖃᖅᑐᖅ ᓄᑭᒃ, ᐅᖃᐅᓯᕆᑉᓗᒋᑦ ᐊᓯᐊᙳᖃᑦᑕᕐᓂᖏᑦ ᐃᓱᒪᓕᕆᔩᑦ ᐅᑭᐅᖅᑕᖅᑐᒥᑦ. “ᐊᓚᐃᓇᐃᑦᑐᖕᓃᖃᑦᑕᖅᑐᖅ ᐅᖃᐅᓯᕆᒃᑲᓐᓂᕆᐊᖃᖃᑦᑕᖅᖢᒋᑦ ᑕᑯᔭᐅᔭᕆᐊᖃᕐᓂᖏᓐᓄᑦ. ᑲᑎᒪᔨᓂᑦ, ᐅᕐᓂᒍᑎᔭᕌᖓᑕ, ᐅᖃᐅᓯᕆᒃᑲᓐᓂᕆᐊᖃᖃᑦᑕᙱᑕᖏᑦ.”
ᑲᑎᒪᔪᓃᑦᑐᑦ ᐅᖃᓪᓚᖃᑦᑕᖅᑐᑦ ᐊᑐᖅᓯᒪᓂᑯᖏᓐᓂᑦ ᐊᒻᒪᓗ ᐅᖃᐅᓯᕆᑉᓗᒋᑦ ᐊᑐᖅᐸᓪᓕᐊᔭᖏᑦ. ᓯᕗᓂᒃᓴᒥᑦ, ᑮᓇᐅᔭᖃᖅᑎᑕᐅᓗᑎᒃ ᐅᕝᕙᓘᓐᓃᑦ ᑐᓂᕐᕈᑎᓂᒃ, ᓄᑭᒃ ᐃᓱᒪᔪᖅ ᖃᓄᐃᓕᐅᖅᑎᑦᑎᓂᖃᒃᑲᓐᓂᕈᒪᑉᓗᑎᒃ ᑲᑎᒪᓂᐅᑉ ᐊᒻᒪᓗ ᐅᖃᓪᓚᖕᓃᑦ ᐊᓯᖏᓐᓂᑦ.
“ᐅᖃᐅᓯᕆᖃᑦᑕᖅᑕᕗᑦ ᐊᑐᕐᓂᑯᕗᑦ ᐃᒥᐊᓗᖕᒥᑦ ᐊᒻᒪᓗ ᐃᑲᔪᖅᑐᐃᑉᓗᑕ ᐊᓯᖏᓐᓂᒃ ᑲᑎᒪᔪᓃᑦᑐᓂᒃ ᑭᓇᑐᐃᓐᓇᒥᒡᓘᓐᓃᑦ ᖃᐃᖃᑕᐅᔪᒥᒃ ᐅᖃᐅᓯᖃᖁᑉᓗᒋᑦ ᐊᔪᓕᕈᑎᖏᓐᓂᑦ ᐅᕝᕙᓘᓐᓃᑦ ᐃᖢᐅᓗᑕᕆᔭᖏᓐᓂᑦ,” ᐅᖃᖅᑐᖅ ᐊᒪᕈᖅ.
“ᓄᓇᓕᖕᒥᐅᑕᑐᖃᐅᔪᒍᑦ. ᓇᒧᙵᐅᓂᐊᖏᑦᑐᒍᑦ. ᐃᑲᔪᕈᒪᑐᐃᓐᓇᖅᑕᕗᑦ ᐃᓄᐃᑦ ᓄᓇᓕᖕᒥᐅᑕᐅᔪᑦ. ᐊᔪᙱᑕᑉᑎᖕᓂᑦ ᐱᓕᕆᓂᐊᖅᑐᒍᑦ. ᑭᐅᔾᔪᑎᓗᒃᑖᓂᒃ ᐱᖃᙱᑦᑐᒍᑦ, ᑭᓯᐊᓂ ᐅᖃᓪᓚᖃᑎᖃᖅᑎᓪᓗᑕ ᐃᓄᖕᓂᑦ ᑲᑎᒪᔪᓄᐊᖅᑐᓂᒃ, ᐱᓕᕆᖃᑎᒌᒍᖕᓇᖅᑐᒍᑦ ᓇᓂᓯᓂᐊᕐᓗᑕ ᐃᑲᔪᕈᖕᓇᖅᑐᓂᒃ ᐃᖢᐃᓗᑕᕆᔭᑉᑎᖕᓄᑦ.”