ᑭᓇᑐᐃᓐᓇᖅ ᖃᕆᑕᐅᔭᒃᑯᑦ ᑭᑐᑐᐃᓐᓇᓄᑦ ᑐᕌᖓᔪᒃᑯᑦ ᑲᖏᖅᖠᓂᕐᒥᑦ ᑕᑯᓯᒪᔪᒃᓴᐅᔪᖅ ᔭᓂᑲ ᐱᓲᑉ ᑐᓴᒐᒃᓴᓕᐊᕆᖃᑦᑕᖅᑕᖏᓐᓂᑦ ᓱᓇᒥᐊᓂᒃ-ᓂᕿᓂᒃ ᓂᐅᕕᕐᕕᖕᒥᙶᖅᑐᓂᑦ ᐋᕐᑎᒃ ᑲᓇᒃᓴᓐᒥᑦ.
ᐃᓐᓄᕆᒃᑑᔪᑦ ᐊᒻᒪᓗ ᐃᔪᕐᓇᖃᑦᑕᖅᑐᑦ ᐅᖃᐅᓯᖃᖅᑎᓪᓗᒍ ᐊᑭᓗᒃᓯᒋᐊᖅᓯᒪᔪᓂᒃ ᐊᒻᒪᓗ ᐱᑖᒃᓴᓂᒃ ᐊᒥᓱᓂᒃ ᐱᑦᑕᐅᔪᓂᒃ ᓂᑉᓕᐅᑎᖃᕈᑕᐅᖃᑦᑕᖅᑐᑦ ᖃᕆᑕᐅᔭᒃᑯᑦ, ᑕᑯᒋᐊᖅᑕᐅᔪᑦ ᐃᓚᖏᑦ ᐊᐅᓚᔪᓕᐊᖏᑦ ᑕᐅᓯᓐᖏᓐᓃᓕᖅᑐᑦ.
ᓂᐅᕕᖅᑎᐅᔪᖅ ᐋᕐᑎᒃ ᑲᓇᒃᓴᒃᑯᓐᓂᑦ, ᖃᐅᔨᒪᔭᐅᔪᖅ ᐊᒥᓱᓄᑦ ᐄᓰ-ᒥᒃ (AC), ᐅᖃᖅᑐᖅ ᐱᒋᐊᓚᐅᖅᑐᖅ ᐊᓂᕝᕕᐊᓂᑦ ᓂᐅᕕᕐᕕᒃ ᐱᑖᒃᓴᖃᖅᑎᑦᑎᖕᒪᑦ ᑕᓚᕕᓴᒥᒃ.
“ᖃᐃᔪᖃᓗᐊᓚᐅᖏᒻᒪᑦ, ᐃᓱᒪᓕᓚᐅᖅᑐᖓ, ‘ᑐᓴᒐᒃᓴᓕᐅᕋᔭᕋᒪ’,” ᐃᖅᖃᐅᒪᔪᖅ ᐱᓱᒃ.
ᓴᖅᕿᑎᓚᐅᖅᑕᖓ ᐊᐅᓚᔪᒃᑯᑦ ᑐᓴᒐᒃᓴᖅ ᐱᑖᒃᓴᕆᔭᐅᔪᖅ ᐅᖃᐅᓯᕆᑉᓗᒍ, ᐊᒻᒪᓗ ᐱᐅᒋᔭᐅᓕᓚᐅᖅᑐᑦ ᑕᐃᑲᙵᑦ.
“ᐅᓐᓄᒃᓴᒥᑦ, ᐱᓕᕆᐊᓂᒃᑲᒪ, ᑕᒡᕙᙵᑦᑕᐃᓐᓇᖅ ᓂᐅᕕᕆᐊᖅᑐᑦ ᐊᒥᓱᙳᑦᑎᐊᓚᐅᖅᑐᑦ,” ᐅᖃᖅᑐᖅ. “ᑐᓴᒐᒃᓴᖃᖅᑎᑦᑎᓂᖅ ᐃᑲᔪᓚᐅᖅᑐᖅ. ᐊᒥᓱᑦ ᐃᓄᐃᑦ ᓂᐅᕕᕐᕕᓕᐊᓚᐅᖅᑐᑦ.”
ᓂᐅᕕᖃᑦᑕᖅᑐᓄᑦ ᐱᐅᒋᔭᐅᓚᐅᖅᑐᖅ. ᐊᐅᓚᔪᓕᐊᑦ ᐃᖅᖃᐃᑎᑦᑎᖃᑦᑕᓚᐅᖅᑐᑦ ᐃᓄᖕᓂᑦ ᐊᓯᖏᓐᓂᑦ ᓄᓇᓕᖕᓂᙶᖅᑐᓂᒃ ᐄᓰ-ᖃᓕᕐᓂᖓ ᑲᖏᖅᖠᓂᕐᒥᑦ, ᐃᓚᒋᔭᐅᔪᒥᒃ ᐊᕐᕕᐊᓃᑦᑐᒥᑦ.
“ᐃᓄᐃᑦ ᐳᐃᒍᖃᑦᑕᕐᒪᑦ ᓄᑖᖑᔪᒥᒃ ᓂᐅᕕᕐᕕᖕᒥᑦ, ᐋᕐᑎᒃ ᑲᓇᒃᓴᓐᒥᑦ, ᑖᒻᓇ ᐱᔾᔪᑎᒋᑉᓗᒍᑦᑕᐅᖅ ᑐᓴᒐᒃᓴᖃᖃᑦᑕᖅᑐᖓ,” ᐅᖃᖅᑐᖅ ᐱᓱᒃ. “ᖃᐅᔨᑎᑦᑎᔪᒪᔪᖓ ᐋᕐᑎᒃ ᑲᓇᒃᓴᓐᒥᑦ ᓂᐅᕕᕐᕕᒃᑕᖃᕐᒪᑦ ᐊᒻᒪᓗ ᑕᐃᒪᓐᓇ ᐃᓄᐃᑦ ᓂᐅᕕᕆᐊᖃᖅᑕᓕᖃᑦᑕᖅᑐᑦ ᑕᒡᕗᖓ.”
ᐊᐅᓚᔪᐃᑦ ᓴᖅᕿᒐᔪᒃᑑᓕᖅᑐᑦ, ᑕᑯᔭᐅᔪᒪᖃᑦᑕᖅᖢᑎᒃ ᖃᕆᑕᐅᔭᒃᑯᑦ. ᓇᖕᒥᓂᖃᖅᑐᖅ ᓂᐅᕕᕐᕕᖕᒥᑦ ᐋᔅᓕ ᓯᑎᐅᓪ ᒫᓐᓇᒧᑦ ᑎᑭᖦᖢᒍ ᖁᕕᐊᒋᑦᑎᐊᖅᑕᖓ ᓱᓕ.
“ᐊᒥᓱᓂᒃ ᐱᐅᑦᑎᐊᖅᑐᓂᒃ ᐱᓕᕆᔨᖃᐅᖅᑐᒍᑦ ᐅᒃᐱᕆᔪᒪᔭᕗᑦ ᐱᓕᕆᔨᕗᑦ ᐃᖕᒥᖕᓂᒃ ᐃᓱᒪᒋᔭᖏᓐᓂᒃ ᐆᒃᑐᕈᒪᒍᑎᒃ ᐊᒻᒪᓗ ᐱᒋᐊᕐᓗᒋᑦ ᐃᓱᒪᒋᔭᖏᓐᓂᒃ ᖃᐅᔨᓴᖅᑕᐅᖏᓐᓈᓗᙱᓪᓗᑎᒃ, ᐊᒻᒪᓗ ᔭᓂᑲ ᑕᐃᒪᓐᓇᐃᓕᐅᓚᐅᖅᑐᖅ ᐃᓱᒪᒋᔭᖓᓂᑦ ᑕᐃᒪᓐᓇᒧᑦ ᓴᕆᒪᒋᑦᑎᐊᖅᑕᕗᑦ” ᐅᖃᖅᑐᖅ ᓯᑎᐅᓪ. “ᖁᕕᐊᓱᖃᑦᑕᖅᑐᖅ, ᐃᓐᓄᕆᒃᖢᓂ, ᐃᒡᓚᔭᒪᑎᖃᑦᑕᖅᑖᑎᒍᑦ ᖃᐅᑕᒫᑦ ᐱᑦᑕᐅᔪᓂᒃ ᓴᖅᕿᔮᖅᑎᑦᑎᖃᑦᑕᕐᓂᖓᓄᑦ.”
ᓯᑎᐅᓪ ᐅᖃᒃᑲᓐᓂᖅᖢᓂ ᐊᐅᓚᔪᐃᑦ ᖃᐅᔨᑎᑦᑎᓚᐅᖅᑐᑦ ᐱᑦᑕᐅᔫᖕᒪᑦ ᐃᒡᕕᐅᒥᐊᕐᓗᑎᑦ ᐊᒻᒪᓗ ᓱᓇᓕᐅᕆᖃᑦᑕᕐᓗᑎᑦ.
ᐱᓱᒃ ᐅᖃᖅᑐᖅ ᐊᓕᐊᓇᐃᒋᔭᖓ ᐃᓄᖕᓂᑦ ᐃᒡᓚᔭᒪᑎᑦᑎᖃᑦᑕᕐᓂᖅ ᐊᒻᒪᓗ ᖁᖓᑎᑦᑎᖃᑦᑕᕐᓂᖅ.
“ᐊᔾᔨᐅᖏᑦᑑᔪᖅ ᐃᓚᖏᓐᓄᑦ,” ᐅᖃᖅᑐᖅ. “ᐊᒥᓲᙱᑦᑐᑦ ᐃᓄᐃᑦ ᐅᖃᖅᓯᒪᔪᓪᓘᓐᓃᑦ, ‘ᓯᕗᓪᓕᖅᐹᖅ ᐃᓅᑉᓗᓂ ᓄᓇᕗᒻᒥᑦ ᑐᓴᒐᒃᓴᓕᐅᖅᑎ.”
ᐊᓯᐊᒍᑦ ᑕᒪᑐᒪ, ᐱᓱᒃ ᐅᖃᖅᑐᖅ ᐃᑲᔪᖅᑐᖅᑕᖏᑦ ᐃᓄᖕᓂᒃ ᐱᓕᕆᔨᓄᑦ ᐃᓚᐅᓕᖁᑉᓗᒋᑦ. ᐱᓱᖕᒧᑦ, ᑲᙳᓇᕐᓂᖅᑕᖃᙱᑦᑐᖅ ᐱᓕᕆᑉᓗᓂ ᓂᐅᕕᕐᕕᖕᒥᑦ.
“ᖃᐅᔨᒪᔪᖓ ᐃᓄᐃᑦ ᑲᙳᓱᖃᑦᑕᖅᑐᑦ ᓂᐅᕕᖅᑎᐅᔭᕆᐊᒃᓴᖅ ᐊᒻᒪᓗ ᐃᓱᒪᖃᑦᑕᖅᑐᑦ ᑮᓇᐅᔭᓕᐅᑦᑎᐊᕐᓇᙱᒻᒪᑦ,” ᐅᖃᖅᑐᖅ. “ᐅᖃᐅᑎᖃᑦᑕᖅᑕᒃᑲᑦ, ᐱᐅᓂᖅᓴᐅᔪᖅ ᑮᓇᐅᔭᓕᐅᙱᓐᓂᕐᒥᐅᖓᓂᑦ, ᐊᒻᒪᓗ ᓈᒻᒪᐅᑎᖃᑦᑕᖅᑐᖅ ᑮᓇᐅᔭᓕᐅᕈᑎᒋᐊᕐᔪᒃᖢᒍ.”
ᓯᑎᐅᓪ ᖃᐅᔨᒪᔪᖅ ᐱᓱᒃ ᐊᓯᖏᓪᓗ ᐱᓕᕆᔩᑦ ᐊᔪᙱᓐᓂᖃᕐᒪᑕ, ᐊᒻᒪᓗ ᐱᒋᐊᖅᑎᑦᑐᖕᓇᕐᓂᕐᒥᒃ ᑐᓂᓯᒪᔪᒪᔭᖏᑦ.
“ᖃᐅᔨᒪᙱᑦᑐᒍᑦ ᓱᓇᓂᒃ ᐱᕕᖃᕐᓂᐅᔪᓂᒃ ᐱᑕᖃᕐᓂᐊᕐᒪᖔᑦ,” ᐅᖃᖅᑐᖅ ᓯᑎᐅᓪ ᐱᓲᑉ ᐊᐅᓚᔪᓕᐊᖏᓐᓂᑦ ᐅᖃᐅᓯᖃᖅᖢᓂ.
ᐃᓚᓯᔪᖅ ᓱᓇᑐᐃᓐᓇᓂᒃ ᓂᐅᕕᐊᒃᓴᓄᑦ ᓂᐅᕕᕐᕕᐅᑉᓗᓂ, ᑲᒻᐸᓂᐅᔪᖅ ᖃᐅᔨᒪᔪᖅ ᐱᓕᕆᔨᖏᑦ ᐱᓕᕇᓐᓇᕐᓂᐊᖏᒻᒪᑕ ᓂᐅᕕᕐᕕᖕᒥᑦ. ᐃᑲᔪᖅᑐᐃᓐᓇᖃᑦᑕᖅᑕᖏᑦ ᐃᓕᓐᓂᐊᖅᑏᑦ ᐱᓕᕆᔪᑦ ᓂᐅᕐᕕᕐᕕᖓᓂᑦ ᐃᓕᓐᓂᐊᕌᓂᖁᑉᓗᒋᑦ ᐊᓯᖏᓐᓂᓪᓗ ᐱᕕᖃᖅᑎᑦᑎᓂᐅᔪᓂᒃ ᐃᖕᒥᖕᓄᐊᖅᑐᓂᒃ.
“ᔭᓂᑲᒧᑦ, ᑕᐃᒪᑐᖅ ᐱᑦᑕᐅᑦᑎᐊᖅᑐᒥᒃ ᐱᓂᐊᖅᐳᖅ ᐃᔪᕐᓇᕈᖕᓇᕐᓂᖓ ᐊᒻᒪᓗ ᖃᓄᐃᓕᐅᕈᖕᓇᑦᑎᐊᕐᓂᖓ ᖁᑦᑎᖕᓂᖅᓴᒧᐊᕈᑎᒋᓗᒋᑦ,” ᐅᖃᖅᑐᖅ ᓯᑎᐅᓪ. “ᐱᒋᐊᕐᕕᐅᓗᑕ ᐱᔪᒪᑐᐃᓐᓇᖅᑐᒍᑦ ᐃᓄᖕᓄᑦ ᐱᓕᕆᔪᒪᔪᓄᑦ ᑲᒻᐸᓂᑉᑎᖕᓂᑦ. ᐊᖏᓂᖅᓴᒥᒃ ᐊᒻᒪᓗ ᐱᐅᓂᖅᓴᒥᒃ ᐱᖃᖁᐃᓐᓇᖅᑕᕗᑦ ᑭᑐᓗᒃᑖᑦ ᐅᕙᑉᑎᒎᖃᑦᑕᖅᑐᑦ.
ᐃᓚᖏᓐᓄᑦ ᐱᓱᖕᒥᑦ ᑕᕐᕆᔭᐅᑎᒦᖃᑦᑕᕐᓗᓂ ᐆᒃᑐᖁᔭᐅᖃᑦᑕᖅᓯᒪᔫᒐᓗᐊᖅ, ᐱᓱᒃ ᑐᐊᕕᙱᑦᑐᖅ.
“ᐊᓕᐊᓇᐃᒋᔭᕋ ᑕᒡᕙᓂ ᐱᓕᕆᑉᓗᖓ, ᐃᓱᒪᒃᓴᖅᓯᐅᕆᓐᓇᖅᑐᖅ,” ᐅᖃᖅᑐᖅ. “ᐱᓕᕆᙱᒃᑳᖓᒪ ᐃᓱᒫᓗᒍᑎᒋᓕᖃᑦᑕᖅᑕᕋ ᐊᒻᒪᓗ ᓱᓪᓗᐊᕐᓇᙱᓕᖅᖢᓂ, ᖁᕕᐊᓱᓚᐅᖅᑐᖓ ᐋᕐᑎᒃ ᑲᓇᒃᓴᓐᑯᑦ ᐱᓕᕆᔨᑖᕆᖕᒪᖓ.”